满洲语口语---三仙女浴布勒瑚里泊 Abkai ilan sargan jui bulhvri omo de ebixehe

Manju gurun i da, golmin xanggiyan alin i xun dekdere ergi bukvri gebungge alin bulhvri gebungge omoqi tuqike. tere bukvri alin i dade bisire bulhvri omo de abkai sargan jui enggulen jenggulen fekulen ilan nofi ebixeme jifi muke qi tuqifi etuku etuki sere de, 

Fiyanggv sargan jui etukui dele enduri saksaha i sindaha fulgiyan tubihe be bahafi na de sindaqi hairame angga de axufi etuku eture de axuka tubihe bilha de xuwe dosifi, gaitai andande beye de ofi, 

Wesihun geneqi ojorakv, hendume, mini beye kuxun ohobi, adarame tutara sehe manggi, juwe eyun hendume, muse lingdan okto jekebihe, buqere kooli akv, sinde fulingga bifi kuxun ohobidere beye weihuken oho manggi, jio seme hendufi genehe. 

Fekulen tereqi uthai haha jui banjiha, abka i fulinggai banjibuha jui ofi uthai gisurembi, goidaha akv ambakan oho manggi eme hendume jui simbe abka faquhvn gurun be dasame banjikini seme banjibuhabi, 

Si genefi faquhvn gurun be dasame toktobume banji seme hendufi abka i fulinggai banjibuha turgun be giyan giyan i taqibufi weihu bufi, ere bira be wasime gene sefi, eme uthai abka de wesike. tereqi tere jui weihu de tefi eyen be dahame wasime genehei, 

Muke juwere dogon de isinafi, dalin de akvnafi burha be bukdafi suiha be sujafi mulan arafi, mulan i dele tefi bisire de, tere fonde tere bai ilan halai niyalma gurun de ejen ojoro be temxenume inenggi dari beqendume afandume bisirede, 

Emu niyalma muke ganame genefi, tere jui be sabufi ferguweme tuwafi, amasi jifi beqendure bade isaha geren i baru alame, suwe beqendure be naka, musei muke ganara dogon de dembei ferguwequke fulingga banjiha emu haha jui jifi tehebi seme alaha manggi, 

Beqendure bade isaha geren niyalma gemu genefi tuwaqi, yala ferguwequke fulingga jui mujangga, geren gemu ferguweme fonjime, enduringge jui si ainaha niyalma. tere jui ini emei taqibuha gisun i songkoi alame,，，，，，

 Bi abkai enduri bihe bukvri alin i dade bisire bulhvri omo de abkai sargan jui enggulen jenggulen fekulen ilan nofi ebixeme jihe, abkai han suweni faquhvn be safi gurun be toktobukini seme mini beye be fulgiyan tubihe obufi emu enduri be saksaha i beye ubaliyambufi fulgiyan tubihe be gamafi bulhvri omo de ebixeme genehe,

Fiyanggv sargan jui etuku de sindafi jio seme takvrafi, tere enduri saksaha fulgiyan tubihe be saifi gajifi fiyanggv sargan jui etukui dele sindafi fiyanggv sargan jui muke qi tuqifi etuku etuki serede tere tubihe be bahafi na de sindaqi hairame angga de axufi bilha de dosifi bi banjiha.。。。。。 

Mini eme abkai sargan jui gebu fekulen mini hala abka qi wasika aisin gioro gebu bukvri yongxon seme alaha manggi geren gemu ferguweme ere jui be yafahan gamara jui waka seme juwe niyalmai gala be ishunde joolame jafafi galai dele tebufi boo de gamafi, ilan halai niyalma aqafi hebdeme muse gurun de ejen ojoro be temxerengge nakaki, 

Ere jui be tukiyefi musei gurun de beile obufi beri gege be sargan buki seme gisurefi uthai beri gebungge sargan jui be sargan bufi gurun de beile obuha. bukvri yongxon xanggiyan alin i xun dekdere ergi omohoi gebungge bigan i odoli gebungge heqen de tefi faquhvn be toktobufi gurun i gebu be manju sehe, tere manju gurun i da mafa inu.

Akdacun jai ulabuha tacin  uthai ergen i ten i wehe 

Faith and tradition are the cornerstones of life 

信仰和传统才是生命的基石